يا ريت عندن متل ما عند الحمير - شعر غازي عيسى

في ناس لما بيوصفوهن بالحمير هيدا ظلم بحق الحمير كبير

الحمار ما بيرمي عا امثالو سهام

ولا يلوث البيئة ولا يهدد مصير

وما بيذبح دجاجة ولا بيقنص حمام

ولا بيسلب النحلة شقاها من القفير

ولا بياكل النعجة ولا كبد النعام

قنعان بشوية تبن مع كمشة شعير

الحمار ما بيقتل فكر اهل القلام

تا يظل متمكن بمملكتو قدير

الحمار ما بيحمل حقد ناس اللئام

وما بيمشي عكس ما يرضي الضمير

الحمار ما بينصب ولا بيعمل فلام

ولا بسلطني بيطمع ولا يعمل امير

ولا ثرثرة بحب ولا بيهوى الكلام

ال من دون طعمة ويعمل الكوكب فطير

عارف حدودو محافظ علا الالتزام

ولا بغير شغلو بيدعي انو خبير

وبيظل جمعة لا شراب ولا طعام

وما يعير عقلو لحدا ولا بيستعير

وبيظل اقوى من الحقد والانتقام

وما بيركب جناح الغدر مهما يصير

يقضم الغيظ يطلب العيش بسلام

لا فرق عندو بين طويل وبين قصير

بنرمي حرام عليه وبنحط الملام

وبنتهمو انو غبي واعمى البصير

اكبر جريمة بنعملا بحقو وحرام

بنشبهوا اوقات ببعض البشر

ويا ريت عندن متل ما عند الحمير